Panorámica da fábrica de fertilizantes dende a Torreta da Central Térmica

Tal e como di a "Memoria do traballo, o comercio e a industria en As Pontes": o complexo industrial de ENCASO en As Pontes, incluía a central térmica, e posteriormente dende o ano 1959 unha Fábrica de Abonos Nitroxenados que eran elaborados a partir do lignito. Este complexo dividíase en tres seccións: A, B e C. As seccións A e B eran as que recibían o lignito, seleccionaban o mellor para a producción de abonos e do demais destinábase a combustible da central térmica. O lignito seleccionado era sometido a todo unha serie de procesos destinados á obtención de amoníaco. Posteriormente na sección C transformábase o amoníaco en nitrato amoníaco cálcico, ensacábase e almacenábase.

Todo o complexo caracterizábase por ser un exemplo da arquitectura racionalista, na que os volumes externos dos edificios responden a unha xeometría cubista, que se relaciona directamente coa orde productiva interna. As fachadas dos edificios ábrense en grandes ventanais, horizontais e verticais, que proporcionaban ó interior unha axeitada aireación e iluminación que responden á necesidade de espazos agradables para o traballo, e tamén ós condicionantes dos procesos desenvoltos no seu interior como pode ser o perigo de explosión dos materiais.

Na panorámica vense as distintas partes da fábrica de fertilizantes: secado, presecado, gasificación, os gasómetros de gas, nitróxeno e osíxeno; e máis ao fondo compresión e nitrato. Tamén se ve, na parte esquerda da foto, a Vilavella e o parque de carbóns por onde chegaba o tren.

De todo isto, só queda unha parte, Distribución e Enerxía que está na entrada fronte á oficina e que agora se chama a de informática. Tamén queda o almacén, que está xunto á estrada.

Concello das Pontes