Procesión de San Cristovo do Vilar

Procesión do Santa Cristovo no lugar do Vilar, arredor do ano 1960.

Na imaxe vense moitas mulleres de loito, antes botaban moito tempo de loito e podía ser tanto por un familiar como polo marido. Sen embargo, dependendo de quen fose o familiar variaba a duración: por un irmán sería 1 ano, por un fillo 2 anos e polo marido, toda a vida. Os homes, en cambio, poñían un brazalete.

O lugar do Vilar desapareceu cos traballos da mina, pero a asociación veciñal “O Noso Barrio”, segue a organizar todos os anos a primeiros de setembro, a Festa do San Cristovo do Vilar no lugar da Esfarrapa (parroquia da Vilavella). A capela vella xa non está, pero edificouse unha nova co mesmo nome no lugar da Esfarrapa: "San Cristovo do Vilar".

O programa da festa actual ven acompañado desta fermosa explicación enviada por Eduardo Soto, membro do "Noso Barrio":

“A este lugar da Esfarrapa seguimos acudindo, cada ano, case as 56 familias que no seu día tivemos que, involutariamente, irnos debido a explotación da mina de carbón que permaneceu “escondida” durante tantos anos debaixo das nosas cociñas, cabanas, leiras e fincas. O campo do Vilar, que ainda existe, foi a orixen de esta festa alo polo ano 1890. Engadir que esta xuntanza anual movea un especial sentimento pero é aberta tamén a quen queira vir a desfrutar da nosa compañía nun bonito entorno.”

Concello das Pontes